“Dokaz odlučnosti i snažne privrženosti NATO politici”

Predsjednik Crne Gore Milo Đukanović čestitao je makedonskom kolegi Stevu Pendarovskom, rukovodstvu i građanima te države, formalno završeni proces ratifikacije protokola o pristupanju Sjevernoatlantskoj alijansi.

“Od danas će se i makedonska zastava vijoriti u sjedištu Alijanse u Briselu. Naša transatlantska zajednica bogatija je za još jednu novu saveznicu. Crna Gora se iskreno raduje velikom i zasluženom uspjehu naših prijatelja, koji je garancija prosperitetnije i sigurnije budućnosti ne samo za Sjevernu Makedoniju, nego za region u cjelini”, navodi se u poruci.

Đukanović navodi da su uzorni politički odnosi i tradicionalno prijateljstvo sada trajno osnaženi i savezništvom u NATO.

“U teškim danima borbe sa pandemijom virusa COVID-19, koja uzima na hiljade života u zemljama saveznicama, prijem Sjeverne Makedonije je još jedan dokaz odlučnosti i snažne privrženosti NATO politici otvorenih vrata i vrijednostima partnerstva, solidarnosti i uzajamne podrške. Radujem se našoj savezničkoj saradnji i zajedništvu u okviru NATO”, navodi se u čestitki Đukanovića.

RTCG.ME